بحر بيضحك
وقلوب قاسية زى الصخر
وسنين ماشية
والله وعــدى ربيع العمر
وكل ما أقرب يوم ع المرسى
فجأة ألاقى فى وشى الغدر
أمتى الضحكة تكون على وشى ؟
أمتى الهم يسيبنى ويمشى ؟
يالله يا عم الهم فارقنى وما تسلمشى
نفسى فى مرة أشوف الفجر
ليه الدمع فى عينى يوماتى ؟
والاحزان بتود حياتى
والله كرهت يا دنيا الماضى
وقلبى ما عاد يقدر ع الصبر
تايه والله فى بحر بيضحك م الحرمان
حتى نسيت من كتر عذابى إن أنا إنسان
سيبنى يا بحر الهم فى حالى أعيش فى أمان
أيوه أنا شايفك قدام عينى زى القبر
لونك أزرق جوا همومك قلبى بيغرق
كل ما أفكر أنام على صدرك ملقاش صدر
يا معذبنى وموجك عالى
سيبنى يا عم البحر فى حالى
ويا أيام الفرح تعالى
نفسى أعيش لو حتى فى جحر
بحر بيضحك
وقلوب قاسية زى الصخر
وسنين ماشية
والله وعــدى ربيع العمر
الشاعر / ناصر عبد المقصود
ليست هناك تعليقات:
إرسال تعليق