بِ عيد الحبّ (باللهجة اللبنانية)
بِ عيد الحبّ عنّيتي عا بالي
كأنِّك ملاك جايي بشَكل إنسان.
بِ عيد الحبّ رِجعِتلي ليالي
كنت فيها إبقى أنا سهران.
كنت فيها قاوِم الذِّكرى
وإعزم عا قلبي راحة النسيان.
بِ عيد الحبّ باقي أنا وحدي
مفتّحة جروحي من حبّي اللي كان.
...
بِ عيد الحبّ رِحت جِبت ورود
حمرا مفرفحة و حطّيتها بِ (فاز).
و جِبت العشا خالص و ضوّيت شَمعَة
وعالطاولة حطّيت صَحن و كاس.
تخيَّلت إنِّك قاعدة بوجهي
و تحرَّك بقلبي دَفا الإحساس.
حسّيت كأنّه إيدي على إيدِك
إنتي الأحلى بين كلّ الناس.
...
ب عيد الحبّ عاتبني زماني
قلبي زِعِل منّي بطَّل يحاكيني.
و من كثر ما زِعِل منّي تمرَّد
صار يدقّ دقّاته الحزينِة.
والدَّمع غشّى النظر عا عيوني
يا ريت عيد الحبّ ما بيعنيني.
بعيد الحبّ كنتي إلي وصرتي
ذِكرى أليمة ما بتنسيني.
...
عدنان خليفة
2017
ليست هناك تعليقات:
إرسال تعليق